10. Wajcha kankañana jakaña kutjtayañataki

Wajcha kankañana utjasirinakampi jila qullqininakampi khuskhachañataki suma arusthapitaskaniwa, ukatakixa sapa mayni jaqiru qawayata khuskhachañawa ch’amachasiskarakini, qullqi tuqita sipansa, jaqi kankañata sipansa ukhamaraki amuyunakata sipansa. Ukampinsa, chachampi warmimpi jisk’achasïwinakasa, jaqi kasta uñjasina, ajanu uñkatasina, jilïri sullkïri uñjasina, saranaka uñjasina jani ukaxa usuta uñjasina jisk’achasiñanakasa maya qawayata chhaqtayaña amuyataskiwa. Ukhama sipanxa khitinakatixa sinti wajcha pisthapita kankañana, uñisita wali llakita uñjasïpkixa taqi jupanakaruwa chiqanxa nayraqata suma yanapasiskarakini.

Uka jach’a amtäwi phuqaña laykuxa, taqi chiqana taqi jaqina suma wiñaya jakaña katxatañapa layku, chachampi warmimpi purapata suma yäqasiñanakapa layku, jani jisk’achisiñana utjañapa layku, Estado taypita:

(a) Taqi jaqitakiwa qullqi jakiñanakapataki irnaqañanakasa utjayasiskarakini, ukatakisti pachpa markanakapana empresa mayachäwinakaxa kunaymana yänaka luranakakapataki ch’amanchasiskarakini.
(ch) Markanakana p’iqiña kankaña apnaqaña tuqita yatiñanakasa ch’amanchasiniwa, ukansti taqi jaqisa kuna utjipansa suma yatiyataniwa, machaqa yatiñanakasa yatichatarakiniwa, yaqha yänaka apnaqañasa amparanakapankarakiniwa, ukampinsa qullqi mant’asiñanakasa taqinitakiwa utjaskarakini.
(h) Kunaymana uta utachachäwinaka ukata thakinakasa aliqata wakisipanjama lurasiskarakini, ukasti taqi jaqina arxatäwinakapampi wakicht’ata luräwinaka phuqaña laykuwa pachpa suyunaka ukata uka taypinkiri markanakana ch’amanchasiskarakini.
(k) Yatiña utanaka ukhamaraki jaqinaka usu qullaña utanaka taypina suma jaqinakaru uñjañatakixa juk’ampi qullqiwa churasiskarakini, ukasti chiqanxa jani qullqini jaqinakatakiwa yanapataskarakini.
(l) Sinti jani kunani pisthapita jalthapita kankañana jikxatasita jaqinakatakisa suma jakañaru kutjtañanakapatakiwa, ¿kunatsa ukhamana jikxatasipxpacha? ukanaka suma yatxatasa kuna wakicht’awinakasa wakisipanxa ch’amanchasiskarakini.
(ll) Jani kunjamata qullqi jakiñani jaqinakatakisa suma yatxatäwinakawa aptasirakini, ukhamata jupanakaru jaqjama yäqasa yanapt’asirakini.
(m) Estado taypina utjiri yänakapasa suma khuskhachäwi qhana chuymampiwa apnaqasiskarakini, ukasti chiqanxa wajcha kankañana utjasirinakana mayjt’añanakapatakiwa taqi markachirinakana arsutanakaparjama uñjkañawa yanapt’asiskarakini.
(n) Taqi jaqinakaru kunanakatixa wakïski uka saranakasa suma uñjataskarakiniwa, ukampinsa wajcha kankañana utjasiri jaqinakasa kuna jucha t’aqäwinakansa suma taqi jaqjama khuskhachaña kankañampi yäqataskarakiniwa.
(ñ) Jani kuna pachamama tipusïwinakampisa llakthapiñataki ukhamaraki jani kuna chijinakaru puriñatakisa taqi jaqiru suma wakicht’asiñaru irptasiskarakini, jani ukhama chijiru puriñataki amuyuyasiñataki, mayampi jaqitatañatakisa qullqisa churataskarakiniwa.