11. Taqi jaqisa jani jisk’achasisa khuskhachasiña chuymampi sartañanakapataki

Taqi jaqisa suma khuskhachäwi kankañampi uñt’ataniwa, kunattixa Perú markana qhana qhana arunxa kunaymana taypina jisk’achasïwi ukhamaraki janiwa jaqita jaqikama purapata yäqasïwixa utjkiti, warminakasa, wawanakasa, chuymani jaqi masisasa, pachpa markasa jaqi masinakasasa, usnaqiri jaqi masisasa, jani kunaru atinisiñani jaqinakasa janisa jaqinakäpkaspa ukhama taktatawa uñjasipxi. Uka jani khuskhachäwi kankañanaka kutjtayañatakixa Estado taypita munasiña kankañampi utjäwinakaru sartäwinakaxa chamanchasiñapa, ukatakisti qullqi tuqitsa, jaqi jaqikama suma mayachasiña tuqitsa, kuna amuyañaka ch’amanchaña tuqitsa taqi jaqiwa khuskhachasiñapa.  

Uka jach’a amtäwi phuqaña laykuxa Estado taypita:

(a) Jaqinakaxa janiwa kunjatsa takikipata mayampsa uñjasxapxañapati, khuskhachäwi kankañampiwa taqinisa sartasiñanakapapxi.
(ch) Taqi markachirinakana mayachäwinakapa aruskipäwinakapa taypinsa warminakaxa suma yatiñani jaqinakajma uñt’ata ch’amanchasa katuqataskarakiniwa.
(h) Warmirusa, chacharusa maya sapa jaqirjama suma uñt’atañapataki, suma uñjatañapataki Estado taypita maya institución sutinchata jach’a mayachäwiwa chhijnuqayasirakini, uka taypita amuyt’atanakaxa chacha warmi jani jisk’achasisa jakasipaxañanakapatakixa ch’amanchasirakini.
(i) Warminakaxa kuna yänaka lurañanaka irnaqäwinakarusa jawsatapxarakikiniwa, jupanakatakixa walja punkunakawa irnaqañanakapataki jist’artasirakini.
(k) Yuqalla imilla wawanakasa, wayna tawaqunakasa, achachila awichanakasa, uta taypina awkita taykata sayt’iri warminakasa, jani kunani wajcha jaqinakasa, armanukuta jaqinakasa, usuta kankañana jikxatasiri jaqinakasa suma tumpthapita yanapt’atasipkarakiniwa.
(l) Pampa ayllunakana utjasiri jisk’achata jaqinakaru sumwa tumpthapisiskarakini, ukatakisti jaqi kankaña suma ch’amanchañataki wakisiri wakichäwinakawa uñstayasiskarakini.