16. Taqi utanakana utjasirinakaru ch’amanchañataki, jisk’a yuqalla imilla, q’axu wayna tawaqu ukata wayna tawaqu suma taqina yäqkaña uywatañanakapataki

Sapa uta taypina utjasiri chacha warmi ukata khitinakatixa jupanakampi chika utjasipki ukampinsa jupanakana suma jaqi kankañampi utjäwinakapawa ch’amanchtaskarakini, panicht’ata chacha warmi jakäwinaka ukhamaraki mayaru tukusa yanapkipasisa jakäwinakawa chiqpachanxa suma yäqataskarakini. Maya uta taypina suma jakaña ch’apaqachirinakaruxa Estado taypita jani ukhama jakapxañanakapataki sumata unanchayasa iwxatapxarakiniwa, uka iwxäwinaka jani katuqasirinakaruxa ukhama jani wali sarnaqañanaka armayañkama juchanchatarakiniwa. Ukhama pachparakiwa taqi aynacht’ata, wajcha kankañani, ukata uñinukuta kankañani utjasiri jisk’a imilla yuqalla wawanaka ukampinsa wayna tawaqunaka suma jakañanakapataki yanapt’äwinakawa ch’amanchasiskarakini. Markanakana utjasirinaka taypina suma purapata yäqasisa, jaqjama uñjasisa, saranakasa arktasa suma jani juchanchasisa jakañanakawa ch’amanchasiskarakini.

Uka jach’a amtäwi phuqaña laykuxa Estado taypita:

(a) Sapa uta taypina chacha warmi ukata jupanakampi chika utjasirinakampi suma khuyapasisa jakasipxañanakapatakisa yatiña utanakana yatiñanakasa yatichasiskarakiniwa.
(ch) Awki taykanaka wawanakaparu suma uywäwinakasa wali yäqataskarakiniwa.
(h) Jisk’a yuqalla imilla wawanakana ukhamaraki q’axu wayna tawaqunakana yatiña utanakana ukata yaqha mayachäwi taypinakana p’iqiña kankaña katxaruña kankañanakapa k’atamapi yäqasa ch’amanchasiskarakini.
(i) Jisk’a yuqalla imilla wawanaka ukhamaraki q’axu wayna tawaqunaka yatiña utanakaru, qullaña utanakaru, juk’ampi yatiñaru, jañurt’äwimpi jakañaru ukata suma jaqi kankañani jakañaruwa irptasiskarakini, ukhamatwa jupanaka pachpatsa, jaqi kankañanakapatsa, luräwinakapa tuqitsa amuyasiskarakini.
(k) Uta taypina jani walt’äwinaka jani utjañaparuwa ch’amanchasini, ukanxa janirakiwa jisk’a yuqalla imilla wawanaka ukhamaraki q’axu wayna tawaqunakaru nuwasnkama irnaqayañasa utjxaniti.
(l) Waynanaka tawaqunakana lunthatasiñataki mathapisitanakapsa janiwa inaki uñch’ukiskaniti, jupanakaru uka jani aski thakita yaqha chiqapa suma jakaña thakirurakiwa irptasxarakini.
(ll)  Terrorismo utjkäna uka pacha warakjata jisk’a yuqalla imillanakarusa, q’axu wayna tawaqunakarusa wali khusa yanapt’äwinakawa churasiskarakini.
(m) Municipalidad mayachäwinaka taypina, yatiña utanaka taypina, uka Defensoria del Niño y del Adolescente sutinchata mayachäwinaka taypita suma uka jisk’a yuqalla imilla wawanakaru ukata q’axu wayna tawaqunakaru juchanchasirinakaru wayxatäwinakampi yanapt’asiskarakini.
(n) Jilawiri wayna tawaqunakana suma k’uchi kanakañani, chuymanakapatjama kunsa lurt’iri ukata kunaymana lurañanakansa jusachaña kankañanakapa ch’amanchäwinakawa nayraru aptasiskarakini.
(ñ) Jichha chikthapita wayna tawaqunakataki, imillpacha wawani chachana jaythjata kullakanakataki ukhamaraki usuri q’axu tawaqunakataki yanapt’äwinakasa utjaskarakiniwa.
(p) Kunaymana mayacht’äwinaka yanapt’apampiwa jisk’a wawanaka sapa uru awki taykanakapa irnaqiri sarañanakapkama suma uñjäwinakawa ch’amanchasiskarakini.
(q) Markanakata wali jaya chiqana p’iqiñanakana armanukuta ayllunakanpacha wayna tawaqunakana jañurt’asiñanakapataki, anatt’añanakapataki ukata jakäwinakapa ch’amanchañataki taqi kunasa lurataskarakiniwa.
(r) Wawanakana ukhamaraki q’axu wayna tawaqunakana chiqapa jakäwinakapasa uka kunaymana yatiyäwinaka arsuña ukata uñacht’ayaña yänaka taypita taqiniru suma uñacht’ayataskarakiniwa, ukhamarusa taqi kuna wakichäwinakasa uka wawanaka q’axu wayna tawaqunaka amtasna wakicht’ataskarakiniwa.
(s) Chacha warmi sarnaqaña tuqitsa khusa yatichäwinakawa aptasiskarakini, kuntixa awki taykanakaxa wawanakapataki chacha warmi sarnaqaña tuqita kuntixa munapki uka amuyunaka suma yäqasisa.
(chk) Wayna tawaqunaka yatiñanakapa suma sapa kutita sapa kutirjama sintpacha ch’amanchañanakapataki aliqa qullqimpi yanapt’awinakasa churasiskarakini.
(t) Uta taypina utjasirinakana ukhamaraki wayna tawaqunakana jani nuwasiñampi jisk’achäwinaka utjañapatakixa kunaymana mayacht’äwinaka taypita aski arusthapïwinakawa utjayasiskarakini.
(u) Estato tuqita lup’iñataki wayna tawaqunakana mathapisïwinakapaxa suma thurinchataskarakiniwa.