20. Chiqapa aka uraqi pacha yatiñanaka ukata markanakana yatiñanakapa ch’amanchañataki

Perú marka pachana taqi chiqana uka ciencia y tecnología sutinchata yatiñanakawa apnaqasiskarakini, ukhamata jaqinakana taqi kuna lurañataki yatiñanakasa amparanakapankañapataki, markanakana yänakapasa chiqaparu apnaqasiñapataki, empresa mayachäwinakasa juk’ampi ch’amanchasiñapataki. Uka yatxatäwinaka tuqita lurtäwinakasa aliqata chiqaparu amuynuqasa uñanuqt’atarakiniwa. Ukampinsa sapa mayni yatxatäwinakana irnaqt’irinakana qillqt’atanakapasa suma yäqatarakiniwa, jupanakasti Estado taypita jawsthapt’asina chhijllt’atarakiniwa, wakisiri amtäwinakasa uka pachparakiwa jajlljt’asiskarakini.

Uka jach’a amtäwi phuqaña laykuxa Estado taypita:

(a) Yatxatäwinakaru wayusiri jilata kullakanakarusa, uka yatxatäwinaka wali khusa ch’amancht’añataki wakisiri yänaka alañatakisa, ukhamaraki yatxatasa machaqa yatiñanaka uñstayirinakatakisa qullqisa Estado taypita churataskarakiniwa, ukatakixa qullqi irañanaka sartayañataki ukhamaraki yaqha tuqinakata qullqi thaqt’äwinakasa suma arusthapisa wakicht’ataskarakiniwa.
(ch) Jach’a yatiña utanakansa, yaqha yatxatäwinaka ch’amanchiri mayachäwinakansa, empresa taypinakansa ciencia y tecnología sutinchata yatiñakawa k’atampi kunayma amtäwinaka taypita aptasiskarakini.
(h) Perú marka pachana jach’a empresanaka taypina wali qullqi wawachayañanaka utjañapatakixa wali sinti yatiñani jilata kullakanakaruwa jawsthapisa suma juk’ampi yatxatäwinakaru mantañanakapataki yanapt’asiskarakini.
(i) Perú marka pachana taqi chiqa suyunaka markanakapana kunaymana luräwinakaru, jaqinakaru, ukhamaraki pachamamaru suma ch’amanchañanakatakixa wakisiri amtáwinakawa wakicht’ataskarakini.
(k) Taqi markachirinakaru, chiqanxa wayna tawaqunakaru ukata jisk’a yuqalla imilla wawanakaru, suma taqi kunasa chuymanakapata apsusa lurtäwinakapa, yant’äwi kankañampi lurtäwinakapa, chiqapa kankaña tuqita lup’iñanakapa ukhamaraki pachamamaru yäqañanakapa ukata yatiyaña yänaka taypita yatiyäwinaka wakicht’äwinakapa, taqi ukhama amuyt’äwinakawa suma nayraru sartayataskarakiniwa.