22. Purapata yanapt’asïwi kankañampi anqäxa jach’a markanakana qhatunaka jakxatañataki

Perú marka pachana suyunakapa uraqinakana lurata yänakapa anqäxa jach’a markanakana qhatunakana taypina chiktayasiñanakapatakixa jani Estado taypinkiri yaqha mayachäwinakana yanapt’apampiwa ukhama alxañanaka tuqita amtäwinakaxa sartayasiskarakini.

Uka jach’a amtäwi phuqaña laykuxa Estado taypita:

(a) Taqi kuna luräwinaka tuqita, qullqi tuqita amuyäwinakasa kamachinakarjamawa apnaqasiskani.
(ch)  Perú marka qullqina yaqha anqäxa jach’a markanakana qullqipampi turkañanaka chaninakapasa janiwa mayakïkaniti.
(h) Taqi aka arusthapïwinaka taypita mayacht’asiñaru puriña arsutanaka phuqaña laykuxa kunaymana Arancel sutinchata qullqi irañanakasa taqi kunana iraqt’atäxarakiniwa.
(i)  Taqi markachirinakataki qullqi irañanakasa khuskhachataskarakiniwa, ukata uka pacha qullqi iranaka mathapiyatampirakiwa anqäxa marka qhatunakaru Perú marka yänakana alxañataki apañanakasa yanapt’ataskarakini.
(k) Anqäxa markanaka qhatunaka taypiru Perú markata yänaka alxañanaka apsurinakana mayacht’asiñanakapasa ch’amanchataskarakiniwa, aduana sutinchata taypita alxaña yänaka chiqaparu apnaqasiñapataki thaqäwinakasa janiwa ch’amäxarakiniti.
(l) Jani Estado taypinkiri mayachäwinaka qullqi yanapt’äwinakapampirakiwa anqäxa markanaru alxañataki yänaka luraña utanakasa aliqata suma machaqachataskarakiniwa.
(ll) Perú marka pachana kunaymana yänaka alakipaña irnaqäwinakatakisa suma arusthapisa qullqimpi yanapanakasa utjarakiniwa.
(m) Uka contrabando sutinchata anqäxa markanakana lurata yänakaxa janiwa Perú marka qhatunakaru mantayasinxarakiniti, kunattixa ukanakawa Perú markana luräta yänakakana alanakapa chanipsa sinti jalantayaraki.
(n) Anqäxa jach’a markanaka qhatunakaparu Perú markana alxañataki lurata yänaka apsuñataki arancel sutinchata qullqi irañanakasa k’achata k’achata chhaqtayasxarakiniwa.
(ñ) Perú marka pachana, yänaka alakipasiña kunaymana qhatunaka taqi chiqaru t’uqintayañataki wali khusa macha amuyunakarakiwa arusthapisiskarakini.
(p) Uka jisk’a jach’a empresa sutinchata mayachäwinakana yanapt’äwinakapampiwa anqäxa markanakaru Perú markana lurata munkaña yänakapa alxañataki apsuñanakasa ch’amanchataskarakiniwa.
(q) Uka anqäxa markanaka qhatunakaru Perú markana lurata yänakapa alxañataki apsüwinakasa suma taqi tuqi uñanuqt’asa q’umachataskarakiniwa.
(r) Estado taypinkiri anqäxa markanaka qhatunakaru alxaña yänaka apnaqiri mayachäwinaka ukata jani Estado taypinkiri ukhama yaqha empresa mayachäwinakampi mayachthapiñatakixa maya jach’a mayacht’äwiwa utt’ayasiskarakini.
(s) Anqäxa marakanaka qhatunakaru Perú markana lurata yänaka alxañataki apnaqiri jisk’a mayachäwinakasa consorcio sutinchata mayachäwinakaru mayachthapitaskarakiniwa.
(chk) Taqi kuna yänaka alakipasiña tuqinakata suma yatxatäwinakawa sartayasiskarakini.
(t) Anqäxa markanaka qhatunakana Perú marka alxasirinaka suma katuqt’atañapatakixa yanapt’äwinaka mayt’awinaka luqt’äwinaksa ch’amanchataskarakiniwa.