26. Suma qhana chuyma utjañanaka ch’amanchañataki, jamasata qullqi katuqasirinakaru, jamasata qullqi luririnakaru, jani qullqi iranakapampi phuqirinakaru ukata kunaymana yänaka anqäxa markanakata apanita alakipanakaru ukhama jani aski luräwinakata jithiqañana

Taqi suma jaqinakaru ukata Estado jach’a mayachäwiruwa, taqi markachirinakana suma jakaña kanakañanaka saranaka yäqasa, ukata jani juchhakisa utjaña, qhana utjañanaka, yatthaptata jakaña, ukata yanapkipasisa jakañanaka wali p’asañapataki amtäwinakawa nayraru sartayasiskarakini.
Uka jach’a amtäwi phuqaña laykuxa Estado taypita:

(a) Taqi chiqa markanakana utjasiri jaqinakana wali amuyasisa taqi chuymampi kamachinaka yäqasa kunaymana luräwinakapawa sartayasiskarakini.
(ch) Estado taypina kunaymana mayachäwinakana irnaqirinakana suma qhana irnaqañanakapawa ch’amanchasiskarakini, ukhamata uka Sistema Nacional de Control sutinchata mayachäwinaka taypita taqi kuna luräwina suma aliqata uñjäwinakasa aptasiskarakini.
(h) Jila jila tukuñanakasa, p’iqiña kankañanaka jani chiqaparu apnaqañanakasa, jamasata jaqi masisata qullqi apsuñanakasa, jaqinakana kankañanakapa taktasa jani wali sarnaqañanakasa qawata q’uqiyatarakiniwa.
(i) Taqi jaqita jaqikama suma purapata yäqasisa, kunaymana juchachasirinakaru achikañanaka suma arjasa, chiqaparu jucha t’aqasa,  ukhama suma jakäwinakawa nayraru sartayataskarakini.
(k) Kamachinaka phuqasa, purapata yanapakipasisa, jani jamasata jaqi masisata qullqi q’arasisa jakäwinakawa chiqanxa sartayasiskarakini, ukhamatpi uka kamachinaka taktasa jani aski sartäwinakasa, jani wakisiri jaqinakata arxatäwinakasa, irnaqäwinakana maya uta taypina utjirinakkama jawsthapisiñanakasa, ch’uxña qullqi layku jani aski yanqha yänaka apnaqañanakasa, anqäxa markanakata alxaña yänaka apnaqäwinakasa, jani qullqi irañanakampi suma arkañanakasa ukata jamasata qullqi jariñanakampi jakäwinakasa qawayata chhaqtayasirakini.
(l) Estado taypita taqi irnaqirinakarusa chiqaparu sarnaqañanakapawa suma uñjasirakini, ukhamata jani jupanaka mayaki kunanaksa irnaqañanakapataki.