8. Perú marka pachana wiñaya suma jakaña ch’amanchañataki, arusthapïwinaka, qullqinaka ukata p’iqiña kankaña apnaqañanaka taqichiqaru utjañapa layku
Perú marka sapa suyunakapana, sapa markana suma jakaña chuymampi sartañawa ch’amanchasini, ukatakixa Gobierno Central taypita taqi kuna lurañanakatakisa qullqixa t’uqiyasini, ukampinsa jani Lima markata maya taqi kuna apnaqañatakisa pachpa jach’a suyunakana ukhamaraki uka taypinkiri markanakaruwa taqi kuna lurañasa iwxasirakini.
Uka jach’a amtäwi phuqaña laykuxa Estado taypita:
(a) P’iqiña kankañanaka ukhamaraki qullqi chiqaparu irtañanakawa sumpacha ch’amanchasiskani. (ch) P’iqiña kanakañanaka, qullqi chiqaparu irtañanaka ukhamaraki arusthapïwinaka chiqapa thakiru ch’amanchäwinakawa thurinchasiskarakini.
(h) Markachirinakaru suma q’uma k’uchi kanakañani utjasiñanakapataki suma irnaqäwi yanapt’äwinakawa churasiskarakini, thakinakasa ukata taqi kuna luratanakasa juk’ampi ch’amachasiskarakini.
(i) Gobierno p’iqiñanaka apnaqañanakasa taqi p’iqiñanakana suma arust’asisa chuymampi phuqatäskarakiniwa.
(k) Taqi chiqa suyunakana ukata markanakapana qullqiniptaniñanakapataki suma arusthapïwinakawa ch’amanchasiskarakini.
(l) Taqi kuna lurañanakatakisa chiqaparu unanchasiñanakawa p’iqt’asiskarakini, suma amtáwinaka utjipanjama qullqisa Estado taypita churasiskani; ukhama sapa suyuta suyuru, sapa markata markaruwa jaqinita jani jaqinirjama qullqisa lakisiskarakini, ukhamata qullqi apnaqañanakaxa suma khuskhachaña chuymampi uñanuqutäskarakiniwa.
(ll) Estado taypinkiri mayachäwinakasa ukhamaraki yaqhanakasa chiqapa thakiri irptatäskarakiniwa, uka Perú markasa pachansa, suyunakansa ukhamaraki markanakansa kunaymana yänaka uñstayiri mayachäwinakawa yanapasiskarakini.
(m) Perú suyunakapa taypina qullqi jakiña layku mayachthapisiña arusthapïwinakawa ch’amanchasiskarakini.
(n) Wakisiri amtäwinaka lurtäwinaka taypita jikxataña layku Municipio sutinchata mayachäwinakana mayachthapisiñaru puriña amtäwinakawa ch’amanchasiskarakini.
(ñ) Jisk’a, taypi ukata jach’a empresa sutinchata mayachäwinakana qullqi mujunakapa sumpacha utanuquyañataki yanapäwinakawa ch’amanchasiskarakini.
(p) Sapa suyuna utjasirinakaru uñaqasjama kuna jani walt’äwinaka utjipansa yanapt’äwinakampiwa luqt’atäskarakini.
